Фотошәҗәрәләрем

Харрас Әюп

Хөрмәтле Мөҗәһит туган!

Син бит таза, нык тамырлы

Мәкъсөт дигән нәселдән.

Аның затлы балалары

Гасырларга чәчелгән.

Җиде буын бабаңны бел…

Онытмадың беркайчан,

Мөҗәһит булалмас идең

Син аларны белмәсәң.

Шуларның бар моңын  җыйган

Чылбырдагы бер буын,

Юкка гына түгел бит ул

Синең мондый булуың.

Кураеңда шигыреңдә

Ил юатыр көй йөри.

Илле диләр,

Игелекнең

Яше була димени!

Гомереңнең мондый серен

Белмәгәнбез лә элек:

Сыздырыр әле, сыздырыр,

Сезнең нәсел – мәңгелек…

2000.

Мөҗәһит Әхмәтҗанов

Шәҗәрә төзим әле

 

 Мәрҗәннәр кебек сибелгән

Туган – тумачаларым.

Бөртекләп җыеп арыдым,

Чәчем бетте чаларып.

 

Гади булсалар да алар,

Алтынга тиңнәр икән.

Белми йөргәнмен шуларны,

Менә бит кемнәр икән!..

 

Һаман әле шәҗәрәмнең

Очына чыга алмыйм.

Исәнләшми йөргәннәрнең

Туган икәнен аңлыйм.

 

Мәрҗәннәр күк сибелгәнбез

Дөньяга килгәнбез дә.

Туган кадерләрен белү

Җитми шул һаман безгә…

 

Шәҗәрәмне төзим әле,

Берүк миннән калмасын.

Чордашларның исе китмәс,

Оныкларым аңласын!..